“Ben-Af”, 6 veta marrin djegie nga bombola e gazit

Prizren, 10 mars – Katër punëtorë të qendrës tregtare “Ben-Af” në Prizren dhe dy punëtorë të spitalit, të enjten, janë lënduar pasi që bombolat e gazit kanë marrë flakë. Sipas hetimeve të para të policisë, incidenti ka ndodhur pasi që bombolat e gazit janë përfshirë nga flakët gjatë ndërrimit të tyre. “Sipas hetimeve preliminare që ka bërë policia në vendin e ngjarjes, thuhet gjatë ndërrimit të një bombole të gazit ka rrjedhë gazit, por nuk dihet ende si është shkaktuar zjarri nga i cili kanë marrë djegie në duar dhe në fytyrë katër punëtor të “Ben-Af”-it dhe dy punëtorë të sigurimit të Spitalit, të cilët kishin ndihmuar në shuarjen e zjarrit deri në arritjen e zjarrfikësve”, ka bërë të ditur Hazir Berisha, zëdhënës i PK-së për rajonin e Prizrenit.
Sadri Hulaj, shef i Emergjencës në Spitalin Rajonal në Prizren, ka bërë të ditur se pacientët pas marrjes së terapisë përkatëse janë lëshuar me gjendje të përmirësuar për kurim të mëtutjeshëm në shtëpi. “Gjashtë pacientë i kemi pranuar me plagë të lehta, të gjashtit pas dy orësh janë liruar nga spitali dhe kanë marrë terapinë adekuate. Në shtëpi kanë shkuar në gjendje të përmirësuar, por me rekomandimin e mjekëve ata do të të vazhdojnë terapinë në shtëpi”, ka shtuar Hulaj.